الشركات التركية تهاجر للسوق المصري.. ياترى ليه

يا ترى إيه سر إقبال الشركات التركية على دخول السوق المصري من أوسع أبوابه، وإيه هي المحفزات اللي بتقدمها الحكومة المصرية للشركات الأجنبية عشان تشتغل في مصر وتتوسع فيها، وايه هي آخر الاستثمارات دي.. هنقولك كل التفاصيل في التقرير  ده فتابعنا للآخر. 
 

في الأيام الأخيرة، أعلنت شركات  تركية كبيرة عن نيتها لدخول السوق المصري، ووضخ استثمارات ضخمة وكان آخرهم شركة متخصصة في مجال حيوي ومهم جداً..

والكلام ده حصل لما التقى المهندس حسن الخطيب وزير الاستثمار والتجارة الخارجية، أمري إرجياس رئيس شركة "إرجياس" التركية لإنتاج خطوط النفط وأنابيب الغاز الطبيعي والمياه.

واللقاء ده شهد، خطة الشركة التركية لإنشاء مصنع لإنتاج أنابيب النفط والغاز الطبيعي والمياه ذات الأقطار الواسعة، باستثمارات أولية 60 مليون دولار، ومن هنا أكد وزير الاستثمار، إن الوزارة حريصة كل الحرص على توفير كل أوجه الدعم للشركة التركية لإقامة مشروعها والتوسع فيه، والتصدير لمختلف الأسواق العالمية.

وكمان، الاقتصاد المصري بيمتلك العديد من المقومات والإمكانات الاستثمارية المتميزة، واللي بتشمل الموقع الجغرافي ومنظومة البنية التحتية للنقل اللوجستي والقوى العاملة المؤهلة وتوافر مصادر الطاقة المتجددة، والموانئ المؤهلة، وده بالإضافة لشبكة اتفاقيات التجارة الحرة والتفضيلية الموقعة بين مصر وعدد كبير من الدول والتجمعات الاقتصادية الإقليمية والعالمية.

كمان، الحكومة المصرية بتستهدف تنفيذ المزيد من الإصلاحات للسياسات المالية والنقدية والتجارية والضريبية، وده كل عشان تسهم في التيسير على المستثمرين وتسهيل حركة التجارة الخارجية لمصر، وجذب المزيد من الاستثمارات المحلية والأجنبية، وزيادة الصادرات المصرية للأسواق الخارجية، وبالتالي انعاش السوق الداخلي وحركة التجارة والاقتصاد ككل.

كمان، الحكومة المصرية بتسعى دلوقتي عشان تكون مصر مركز إقليمي للتصدير، وده بسبب اللب بتتمتع به مصر من موقع جغرافي متميز جاذب للاستثمار، خاصة وأن السوق المصري بيتمتع بمميزات ومقومات كتيرة ، زي توافر العمالة المدربة والمؤهلة لمواكبة سوق العمل العالمي وبأجور تنافسية، وكمان الكوادر الهندسية المتميزة، يعني السوق جاهز وعنده كل المقومات لاستقبال أي استثمارات خارجية وبيراهن على نجاحها.

عشان كده، إمري إرجياس مدير الشركة التركية، أكد أن الإجراءات اللي بتقوم بها الحكومة المصرية، ممتازة وبتستهدف جذب المزيد من الاستثمارات والشركات الأجنبية، وأكد كمان إن السوق المصري بيتمتع بفرص ومقومات استثمارية متميزة.

وقال كمان، إن شركة Erciyas بتتمتع بخبرة كبيرة جدا في مجال مشاريع خطوط أنابيب النفط والغاز عالية القوة في مختلف بلدان العالم، وإنها بتخطط لإنشاء مصنع في مصر لإنتاج أنابيب خطوط النفط والغاز والمياه تتحمل الضغط العالي، ذات أقطار بين ٢-٣ أمتار، باستثمارات ٦٠ مليون دولار، ومش بس كده، ده الشركة بتستهدف كمان تحقيق عائد استثمارات بحوالي 200 مليون دولار، من خلال تصدير 60 % من الإنتاج للأسواق الخارجية، و 40% للسوق المصري لوحده.

والكلام ده ممتاز جدا، و مؤشر إيجابي لكل مستثمري العالم بأن السوق المصري سوق واعد، وقادر وبقوة على استيعاب رؤوس الأموال الأجنبية وتنميتها كمان وتحقيق مكاسب بمليارات الدولارات، وده كمان بجانب التسهيلات اللي بتقدمها الحكومة للمستثمرين الأجانب وغيرهم من المستثمرين المحللين، وكل الإجراءات دي بتساهم بشكل كبير في انعاش الاقتصاد المصري، عشان كده بعد كام سنة هنشوف مصر في حتة تانية خالص.