دفع الكتروني وهدايا دهب من بنك ناصر.. شوف ليه

أغلب الشعب المصري حاليا معاه بطاقات دفع الكتروني، وبطاقات فيزا، لكن عمرك سمعت أنك ممكن تكسب فلوس دهب من كروت الدفع الالكتروني.. لو عايز تعرف اية هو البنك اللي بيقدم فلوس دهب للعملاء من استخدام بطاقات الدفع الفوري والمباشر شوف التقرير  ده للأخر.

بنك ناصر الاجتماعي واحد من البنوك اللي موجودة في مصر واللي بتقدم خدمات كتيرة جدا للعملاء، ومؤخرا اعلن مشاركته مع شبكة ميزة الوطنية في مسابقة لعملاء البنك تحت شعار دايما ادفع بميزة تكسب ميزة، وده في إطار تعزيز جهود الدولة لتحقيق الشمول المالي على مستوى الجمهورية.

بنك ناصر الاجتماعي اعلن عن اتاحة فرصة للعملاء لاشتراك حاملي بطاقة ميزة الصادرة عن البنك لأكبر عدد من معاملات الشراء في السحب للفوز بنصف جنيه دهب، وأكد إن المسابقة خاصة بالمشتريات بس، وهيكون في فرصة أن العميل يكون كسبان من ضمن 100 فائز البنك هيعلن عنهم شهريا .

بنك ناصر الاجتماعي اعلن كمان أن حملته لتقديم نصف جنيه دهب للعملاء وكمان واللي هتضم 100 فائز شهريا هتكون مستمرة لـ 31 ديسمبر 2024، وقال كمان أن البنك معندهوش حد أدني مطلوب لقيمة المشتريات، وان المسابقة دي هيتم تنظيمها تحت إشراف وزارة التضامن الاجتماعي، وتصريح حماية المستهلك رقم 311 لسنة 2024.

طيب ليه بنك ناصر الاجتماعي اعلن عن المسابقة دي حاليا؟.
بنك ناصر الاجتماعي قال أن المسابقة دي جاية في اطار خطة الدولة للشمول المالي واللي البنك بدأت في تطبيقها للمساعدة في تحقيق منظومة آمنة تحقق أهداف الدولة لإدخال شرائح مختلفة على المنظومة المالية، وكمان تقديم وتسهيل الخدمات الحكومية المختلفة، وإصدار بطاقات ميزة لعملاء البنك أو للمستفيدين من برنامج تكافل وكرامة تمكنهم من الصرف من وسائل الدفع المختلفة كنوع من اجراءات تيسير إجراءات الصرف للمستحقين.
البنك قال كمان أنه اصدر أكثر من مليون بطاقة ميزة، وده في اطار توجه الدولة لدعم وتشجيع تقديم الخدمات المالية الإلكترونية لجميع فئات المجتمع، من خلال بطاقات ميزة الجديدة يقدر العملاء يصرفوا الدعم النقدي المخصص لهم من فروع البنك واللي بيوصل عددها لـ 102 فرع، ده غير امكانية السحب النقدي من خلال ماكينات الصراف الآلي المرتبطة بالشبكة القومية للمدفوعات .