مخططات ضرب الاقتصاد وخطط الغرف المظلمة ومنصات ...
إيه اللي حصل في الأسواق خلال الساعات اللي فاتت وليه منصات الشر رجعت تنشر سمومهها من تاني واشمعنا مركزين هجومهم على الدولار والاقتصاد وايه الجديد في قانن الايجارالقديم.. وياترى إيه اللي بيحصل في سوق الدهب.. خليكم معانا للأخر وهنعرف التفاصيل في التقرير التالي.
على مدار الساعات اللي فاتت حصلت أكتر من حدث مهم في مصر منها وأخطرها نشر أخبار غير حقيقية عن طلب مصر من صندوق النقد الدولي زيادة قيمة الشريحة الرابعة ل2 مليار دولار..
الأخبار دي نفاها محافظ البنك المركزي حسن عبد الله بصفته محافظ مصر لدى صندوق النقد الدولي وأكد إنه لا توجد أي صحة لما تردد في بعض الوسائل الإعلامية بخصوص طلب مصر زيادة الشريحة المقبلة من صندوق النقد الدولى
وطبعا مش محتاجين نأكد إن الشائعات دي هدفها خلق حالة من عدم الثقة عند الناس بخصوص مستقبل الاقتصاد المصري.. ومن هنا جاء دور الحكومة إنها تطلع وتوضح الحقيقة للناس خصوصاً في المواضيع اللي بتأثر بشكل مباشر على الحالة الاقتصادية للبلد
والشائعات دي في الغالب بتبقى محاولات للتشويش على التقدم اللي مصر بتحققه.. لأن كل شائعة بتتطلع وبتتنشر ممكن تكون جزء من حملة ضغط إعلامي أو سياسي هدفها إن الناس تفقد الثقة في الاقتصاد المصري.. وده ممكن يكون لمصالح أطراف معينة..
من الأحداث المهمة كمان كان قرار البنك المركزي المصري سحب سيولة ضخمة جدًا من البنوك العاملة في السوق وبفايدة عالية وصلت لـ27.75%..
وأسباب القرار ببساطة إن البنك المركزي دوره الأساسي إنه يحافظ على استقرار الاقتصاد.. يعني يبص على معدلات التضخم اللي هو باختصار ارتفاع الأسعار ويتحكم فيها عشان الأسعار ما تطلعش من غير رقابة.. وواحدة من الطرق دي هي إنه يرفع الفايدة عشان يقلل السيولة اللي في السوق
كمان البنك المركزي بيسحب السيولة ده بيبين حجم التضخم اللي البلد فيه ورسالة إن في تحكم اقتصادي بيساعد في استقرار السوق.. كمان المستثمرين بياخدوا خطوات البنك المركزي على محمل الجد وده بيعزز ثقتهم في الاقتصاد.. بالتالي، سحب السيولة مهم مش بس عشان التضخم، لكن كمان عشان يحافظ على قيمة الجنيه في سوق العملات.
على مدار الأيام اللي فاتت شفنا كمان أرقام كتير جدا عن تطور الصناعات المصرية والصادرات المصرية
وفي آخر إحصائيات رسمية مصر حققت إنجاز كبير جدًا في قطاع الصناعات الغذائية واحتلت المراكز التسعة الأولى في تصدير 13 سلعة مختلفة وده بناءً على بيانات رسمية من مركز التجارة العالمي التابع للأمم المتحدة اللي أشار بوضوح إن مصر تزعمت تصدير أكتر من منتج.
ومن الأرقام دي مثلا إن مصر بقت رقم 1 في تصدير الفراولة المجمدة تخيل، وكمان احتلت المركز الرابع عالميًا في تصدير البصل المجفف وفي تصدير البذور والثمار الزيتية.
من بين الأحداث المهمة واللي شغلت بال المصريين الفترة اللي فاتت كان التطور السريع في أزمة الإيجار القديم والعلاقة بين المالك والمستأجر..
وزي ما احنا عارفين المحكمة الدستورية العليا طلعت حكم تاريخي بعدم دستورية بعض المواد في القانون رقم 136 لسنة 1981، والخاص بتأجير الأماكن وتنظيم العلاقة بين المؤجر والمستأجر، ومن يوم الحكم ده وبقي في هاجس عند الناس، صاحب الملك عايز يطرد السكان بأي طريقة، والمستأجر مش عايز يدفع زيادة عن النسبة اللي موجودة في العقود وبقي في مشاكل ولغط كبير موجودة حاليا بين الناس.
ائتلاف ملاك العقارات القديمة دخل علي خط الأزمة قرار المحكمة الدستورية العليا وقال إن الملاك بيتعرضوا للظلم والقهر على مدار أكثر من 43 سنة بسبب نظام وقانون الإيجار القديم، وأكد أن القيمة الإيجارية لازم ترتفع لـ 2000 جنيه، ولازم فترة توفيق الأوضاع توصل ل3 سنين
كمان ائتلاف ملاك العقارات قال إنه لازم يتم كتابة عقد جديد بين المالك والمستاجر بموافقة الطرفين علي نظام الإيجار وطريقة وقيمة المبلغ اللي هيدفعه المستاجر شهريا مقابل الأيجار.
