هتوصل لـ10%.. شوف توقعات انخفاض أسعار الفايدة في البنك المركزي

كل الناس بتتكلم في مصر  دلوقتي علي تخفيض فايدة جاي علي الابواب، والكلام كله ان التخفيض ده هيكون مع بداية السنة الجديدة في 2025، ياتري اية حقيقة الكلام ده وتخفيض الفايدة هيوصل لكام.

كل الناس كانت مترقبة وجود تحفيض في اسعار الفايدة في اجتماع لجنة السياسات النقدية بالبنك المركزي اللي فات واللي كان في شهر أكتوبر، ولكن لجنة السياسات النقدية قررت الابقاء علي اسعار الفايدة بشكلها الطبيعي بدون اي تحفيض أو زيادة، وده كان عكس التوقعات اللي كانت بتأكد ضرورة تخفيض الفايدة علشان نواجهة التضخم اللي موجود في مصر .
طيب اية اللي هيحصل في مصر بخصوص اسعار الفايدة في الفترة اللي جاية؟.
بنك مورجان ستانلي واللي هو واحد من اهم وأكبر البنوك الأمريكية العالمية توقع بدء خفض البنك المركزي لسعر الفائدة بشكل تدريجي بداية من 2025، وهتوصل لـ17.25% على الودائع بحلول ديسمبر 2025 من 27.25% حاليا في البنوك.
بنك مورجان ستانلي قال في تقريره، أن قرارات لجنة السياسات النقدية في البنك المركزي المصري خلال 4 اجتماعات بالابقاء علي اسعار الفايدة بدون تغيير علي مستوياتها المرتفعة 27.25% للإيداع و28.25% للإقراض واللي هتفضل بشكلها ده لحد نهاية نهاية شهر ديسمبر اللي جاي كان محاولة لوضع حد ووقف معدل التضخم.

البنك العالمي توقع انخفاض كبير في معدل التضخم  لـ 14% و15% على أساس سنوي في الربع الأول من 2025، وده ضمن خطوات وجهود البنك المركزي لايقاف معدل التضخم واللي تسارع في آخر 3 أشهر على التوالي وسجل 26.5% في أكتوبر اللي فات بعد ما وصل لـ 26.4% في شهر سبتمبر الي فات برضوا بسبب قرارات الحكومة بزيادة اسعار البنزين والسولار.

البنك قال كمان في تقريره أن معدل التضخم لحد اللحظة دي بعيد جدا عن مستهدفات البنك المركزي واللي عايز يحققها في شهر ديسمبر اللي جاي واللي مستهدف توصل لـ 5% إلى 9%.
البنك قال كمان أن أسعار الفائدة الحقيقية هتفضل مرتفعة في البداية قبل ما ترجع لوضعها الطبيعي عند نحو 3.5% في النصف الثاني من عام 2025.
طيب إيه اللي هيحصل في حالة تخفيض أسعار الفايدة ؟
أول حاجة خفض سعر الفايدة هينعش وتيرة الاقتراض للأفراد والشركات ودا معناه انتعاش النشاط الاقتصادي بشكل كبير لأن فيه شركات كبيرة كتيرة وخاصة شركات التطوير العقاري مثلا بتعتمد في شغلها على برامج التمويل من البنوك ودا معناه بردو إن أسعار المنتجات دي هتنزل بسبب تقليل التكاليف وكمان خفض الفايدة هيشجع ناس كتير على أنها تقترض وتعمل مشروعات خاصة بيها عشان تحسن دخلها.

في نفس الوقت خفض الفايدة هيرفع أسعار الدهب عشان ناس كتير هتقرر تحول استثماراتها قي شهادات الادخار مثلا واللي فائدتها متوقع تنزل مع قرار الخفض المتوقع وهتروح لأسواق تانية زي الدهب باعتباره الاستثمار المضمون والامن بعد شهادات الادخار وزيادة الطلب على الدهب هترفع سعره أكيد بشكل كبير.