تحط فلوسك في دفتر توفير ولا حساب بنكي؟.. هنقولك إيه الأنسب ليك

إيه الأنسب ليك؟ دفتر توفير البريد ولا الحساب البنكي؟ تحوش في البريد عشان البساطة وسهولة الاستخدام؟ ولا تختار البنك عشان الخدمات المتطورة والخيارات المتعددة؟ وامتى تختار ده أو ده؟ تعال نجاوب على كل الأسئلة دي في التقرير  ده.

الادخار بقى حاجة أساسية لأي حد النهارده لأنه مش بس بيضمن أمان مالي لو حصلت أزمة لكنه كمان بيساعدك تأمن مستقبلك ومستقبل عيلتك… وكلنا عايزين نعرف أفضل طريقة نحط فيها فلوسنا ونزود قيمتها فلو بتحوش البريد والبنوك هما أكتر مكانين بيوفروا حلول للادخار وكل واحد فيهم ليه مميزات وعيوب.

نبدأ بالبنوك ..البنوك بتقدم مجموعة واسعة من المنتجات الادخارية زي الشهادات، الودائع، والحسابات بأنواعها.

عندك مثلا الحساب الجاري .. ده الأنسب لو عايز تسحب وتودع فلوسك بسهولة طول اليوم باستخدام ماكينات الصراف الآلي اللي موجودة في كل حتة. تقدر كمان تطلب دفتر شيكات أو بطاقة خصم مباشر، وأحيانًا بطاقة ائتمانية للشراء أو التقسيط. لكن، العيب الكبير هنا إن الحساب الجاري ما بيديش أي عائد

وفيه حساب التوفير..  وده مناسب لو عايز تحط فلوسك وتأمنها وفي نفس الوقت تكسب عائد عليها. تقدر كمان تستخدم بطاقة الخصم المباشر لسحب فلوسك من أي ماكينة وقت ما تحتاج. حساب التوفير بيجمع بين السهولة والعائد اللي بيزود قيمة مدخراتك

وفيه كمان شهادات الادخار.. وده يعتبر الاختيار المناسب لو عايز تحوش مبلغ لفترة طويلة وتأمن عائد ثابت أو متغير عليه. الشهادات بتكون مدتها بين سنة و10 سنين، والعائد ممكن يكون شهري، ربع سنوي، أو سنوي. الفايدة هنا بتكون أعلى من حساب التوفير، وكمان تقدر تاخد قرض بضمان الشهادة

أما بالنسبة لدفتر توفير البريد، فميزته الأساسية إنه بيخليك تبدأ بمبلغ صغير جدًا عكس البنوك اللي أحيانًا بتحط حد أدنى لفتح الحساب البريد مناسب جدًا للي عايز يحوش من غير تعقيد أو شروط كتيرة كمان دفتر التوفير بيديك عائد على فلوسك، وده بيخلي المدخرات تزيد بشكل آمن وسهل

طيب... إيه الفرق الأساسي بين البريد والبنك؟

لو عايز خدمات بنكية متطورة زي القروض، بطاقات الائتمان، أو الاستثمار في شهادات، البنوك هي الأنسب ليك.. لكن لو بتدور على مكان بسيط وآمن تحط فيه فلوسك وتبدأ بمبلغ صغير جدًا البريد هو الحل المثالي

كمان لازم تاخد بالك من حاجة مهمة..  بعض البنوك دلوقتي بتوفر فرصة فتح حسابات بدون حد أدنى وده بيقربها أكتر من فكرة دفتر التوفير في البريد، لكن البنوك بتتفوق بخدماتها الإضافية

الاختيار بين البريد والبنك بيرجع لاحتياجاتك أنت… عايز مكان بسيط وعملي؟ روح للبريد. بتدور على خدمات متطورة وخيارات أكبر؟ البنك هو الحل. والأهم، فكر كويس قبل ما تحط فلوسك، واختار المكان اللي يناسب احتياجاتك وظروفك المالية