لو ناوي تحج السنة في 2025.. شوف الأسعار النهائية لبرامج الحج

 
 
كل الناس حاليا بتسأل عن أسعار برامج الحج سواء كان حج سياحي أو حج الجمعيات الأهلية أو حج قرعة الداخلية..يأتري الأسعار هتوصل لكام لبرامج الحج للسنة اللي جاية. خليكم معانا للآخر وهتعرفوا التفاصيل

 
الحج واحدة من الفرائض اللي الناس بتستناها من سنة التانية وكل الناس سواء عملوا مناسك الحج أو معملوهاش نفسهم يروحوا الأراضي المقدسة ويحجوا بيت الله الحرام ويطوفوا بالكعبة الشرفية ويقفوا علي جبل عرفات ويرموا الجمرات ويؤدي المناسك زي ما أداها رسولنا الكريم صلى الله عليه وسلم.

زي ما احنا عارفين أن مناسك الحج في مصر بيشرف علي تنظيمهم 3 جهات رئيسية في مصر هما وزارات الداخلية اللي بتنظم حج وزارة الداخلية والتضامن الاجتماع اللي بتنظم حج الجمعيات الأهلية ووزارة السياحة والآثار واللي بتنظم الحج السياحي ولحد دلوقتي وزارة الداخلية أعلنت عن فتح باب حجز برامج الحج للموسم الجديد.

طيب اية اللي جاي بالنسبة لباقي الجهات اللي بتنظم برامج الحج؟.
وزارة السياحة والآثار أعلنت عن حجز برامج الحج السياحي للموسم الجديد وحاليا شركات السياحة بدأت في تجميع جوازات الناس اللي عايزين يعلموا مناسك الحج الجديد من خلال قرعة الحج السياحي، وفي خلال أيام قليلة قوي وزارة السياحة والآثار هتعلن عن اعتماد الضوابط المنظمة لموسم الحج بعد من اللجنة العليا للحج والعمرة انتهت من صياغتها وإعدادها وحاليا الضوابط موجودة علي مكتب شريف فتحي وزير السياحة والآثار لاعتمادها واقرارها.

الضوابط الجديدة للحج السياحي وفقا لمصادرنا أكدت أن هيام تحصيل مبالغ 20 الف جنية من كل واحد عايز يقدم علي برامج الحج السياحي للمستويين البري أو الاقتصادي،. هيتم تحصيل 60 الف جنيه من الناس اللي عايزة تقدم علي المستوي 5 نجوم .

المصادر كملت كلامها وقالت لنا، أن أسعار الحج السياحي للمستوي البري بدون تحسين إقامة بمكة بفنادق أو عمائر سكنية وحتي مسافة 3 كيلو متر من الحرم المكي هيوصل سعرها ب225 ألف جنيه،  والحج البري تحسين 5 نجوم هيوصل سعره 243 ألف جنيه والحج البري موسم كامل إقامة بفنادق مكة وحتي 1750 مترا من الحرم المكي هيوصل سعره ل260 ألف جنيه، والحج الاقتصادي طيران بدون تحسين هيوصل سعره ل250 ألف جنيه والحج الاقتصادي طيران تحسين سكن 5 نجوم هيوصل سعره ل268 ألف جنيه والحج الاقتصادى طيران موسم كامل إقامة بفنادق لا تبعد عن الحرم المكى أكثر من 1750 مترا هيوصل سعره ل295 ألف جنية

اما الناس اللي بتسال عن الرفاهية، فالمصادر قالت إن أسعار برامج 5 نجوم صف أول مباشر على الحرم وحتى 250 متر من الحرم المكي هيوصل سعرها ل580 ألف جنيه، اما برامج حج 5 نجوم صف ثاني على الحرم المكي هيوصل سعره ب250 وحتى 1250 متر بسعر  520 ألف جنيه، وطبعا كل الأسعار لسه هتزيد تاني في الفترة اللي جاية خصوصا أن الأسعار دي كلها بدون أسعار تذاكر الطيران أو تذاكر السفر بالاتوبيسات للنقل البري .