انجازات السيسي في الزراعة والعاصمة الإدارية.. ...
متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة أبحاث بانكير على مدار الساعة النهاردة الاثنين 11 نوفمبر 2024.
النهاردة منصات بانكير قدمت تقارير مختلفة في التناول وأغلبها بيدور عن حجم الانجازات اللي حصلت في الاقتصاد المصري بكل قطاعاته وازاي مصر قدرت في ظرف أقل من 9 سنين قليلة أنها تعمل انجازات كانت هتحتاج عشرات السنين عشان تتعمل وازاي الدولة سابقت الزمن عشان تنهي آلاف المشروعات في كل مناحي الاقتصاد سواء بنية أساسية أو مشروعات صناعية وزراعية وسكنية وقدرت تجذب الاستثمارات الأجنبية من تاني بشكل غير مسبوق في تاريخها الحديث والقديم.
البداية مع تقرير خاص عن العاصمة الإدارية الجديدة باعتباره
أكبر المشاريع العمرانية اللي أتعملت في تاريخ مصر الحديث وجت فكرته من زحمة القاهرة والخنقة اللي فيها الشوارع وكمان السيسي فكر بطريقة يخلي الناس تفكر بشكل مختلف ويديها أمل في بكرة وأن مصر ممكن تبقي زي اي دولة حديثة عندها مباني عالمية وذكية ومدن زي اللي بيشوفوها في أوروبا وفي نفس الوقت تأسس لمرحلة جديدة في تاريخ المعمار المصري وينشط فكرة تصدير العقار وإظهار قدرات جديدة في الاقتصاد المصري وكمان يوطن البراندات والشركات العالمية ومن هنا قرر السيسي في سنة 2015 وبعد شهوربس من توليه الحكم أنه يبدأ ويعلن عن مشروع العاصمة الإدارية الجديدة.
وشرح التقرير إن المشروع لانه كان جديد وطموح جدا وضخم بشكل غير مسبوق كان فرصة أن منصات الشر تهاجمه وتقول ايه لازم مشروع هيكلف مليارات وهيتعمل في الصحرا البعيدة لكن لأن السيسي عنده بعد نظر ماسمعش للتفاهات دي وطرح المشروع فعلا ومن ساعتها ومصر فكرها اتغير واقتحمت عالم المعمار العالمي والحديث وخلقت مجتمعات جديدة والصحرا طرحت مليارات الدولارات .
ولفت التقرير إن مشروع العاصمة الإدارية الجديدة شرق القاهرة، بيمتد على مساحة تصل إلى 700 كيلومتر مربع، ودا بيخليها واحدة من أكبر المدن الجديدة في العالم بجانب رؤية الاستثمار الي اعتمد عليها مشروع العاصمة الإدارية كان فيه هدف تاني للحكومة وهو نقل الوزرات والهيئات الحكومية من قلب القاهرة لتخفيف الزحام من ناحية ومن الناحية التانية الاستفادة من المقارات دي في مشروعات تانية وبتضم العاصمة الإدارية مقرات 34 وزارة ومراكز حكومية،.
وأشار تقرير بانكير إن مشروع العاصمة الإدارية الجديدة بمراحله المختلفة مقرر استيعاب ما بين 6.5 إلى 8 مليون نسمة ودا رقم بيساوي عدد سكان دول جمبنا .. المفاجأة بقي أن العاصمة الإدارية الجديدة بتضم مناطق صناعية ضخمة وبدأت في طرح الأراضي بالفعل للمصنعين المصريين والأجانب .
التقرير التالي اللي قدمته وحدة أبحاث بانكير كان بخصوص النهضة الزراعية اللي حصلت في عهد الرئيس السيسي وازاي اتحولت الصحراء إلى واحات خضراء.
وقال التقرير ان فيه إنجازات غير مسبوقة حصلت في القطاع الزراعي المصري في عهد الرئيس عبد الفتاح السيسي وتحديداً على مدار الـ 10 سنين اللي فاتوا مشروعات قومية ضخمة مش بس لزيادة الإنتاج لكن كمان لتحقيق الاكتفاء الذاتي وتأمين غذاء المصريين في ظروف صعبة وتغيرات عالمية
وشرح بانكير إن بداية النهضة الزراعية كانت من مشروع المليون ونص فدان، اللي أطلقه الرئيس السيسي سنة 2015 وكان الهدف منه استصلاح الأراضي الصحراوية وزيادة الرقعة الزراعية، وده كان بداية نقلات نوعية في قطاع الزراعة.. المشروع ده مش مجرد زراعة، لكن بناء مجتمعات عمرانية جديدة حوالين الأراضي الزراعية دي.. عشان نستغلها في الزراعة والتجارة وتكون مناطق صالحة للعيش في واحات زي الفرافرة، والمناطق دي موزعة على 13 منطقة في 8 محافظات منها قنا وأسوان وجنوب سيناء والجيزة. وبالدراسات المتعمقة، اتحطت البنية التحتية المناسبة عشان تكون مستدامة وتساعد في تأمين موارد الغذاء.
ولفت التقرير إن الحكومة أطلقت كمان مبادرة القرية المنتجة اللي بتستهدف تحويل القرى من مجرد مستهلكة لإنتاجية ودي اتنفذت بالتعاون مع وزارتي الزراعة والتنمية المحلية عشان توفر فرص عمل للشباب وتستغل الموارد المحلية وتدعم الصناعات القائمة على المحاصيل المتاحة، وده كله بهدف زيادة دخل الأسر الريفية
وسلط التقرير الضوء على قفزات الصادرات الزراعية اللي تخطت الـ 4 مليارات دولار ووصلت إلى 6.9 مليون طن منذ بداية 2024.. وده إنجاز ضخم مقارنة بالأعوام اللي فاتت.. وكل ده بيحصل مع جهود الدولة لدخول أسواق جديدة وكبيرة زي أمريكا اللاتينية والصين ودول في أفريقيا وده بيعني دعم الاقتصاد المصري عن طريق منتجاتنا الزراعية اللي بقت دلوقتي على أرفف الأسواق العالمية
ومع الكلام عن النهضة الزراعية لازم نذكر المشروع القومي للغذاء اللي بيهدف لإنشاء 100 ألف صوبة زراعية.. يعني، إحنا مش بس بنزرع في الأرض العادية لكن بنحاول نستغل كل متر مربع في زراعة منتجات عالية الجودة وخالية من الملوثات زي الخضروات والفاكهة، وده بيساهم في رفع جودة الأكل اللي بنستهلكه يومياً
وسلط التقرير الضوء كمان على مشروع الدلتا الجديدة اللي بيعتبر من أكبر المشروعات الزراعية النهاردة وبيهدف لاستصلاح وزراعة أكتر من مليون فدان.. المشروع ده بيكلف مليارات، وهدفه مش بس زراعة الأراضي، لكن كمان بناء مجتمعات زراعية كاملة حوالين الأراضي دي.
من بين التقارير اللي قدمتها منصات بانكير كان تقرير مهم جدا عن انفراجة كبرى في أزمة الدولار..
وشرح بانكير تفاصيل الارتفاع الكبير في تحويلات المصريين اللي بيشتغلوا بره والأرقام اللي بتقول إن التحويلات ارتفعت في أول 8 شهور من 2024 بنسبة 36.4%، ووصلت لـ 18.1 مليار دولار مقارنةً بـ 13.3 مليار دولار في نفس الفترة من 2023.. يعني بنشوف زيادة ضخمة ومستمرة.. وده لسه مش نهاية القصة.. لأن في أغسطس بس التحويلات كانت 2.6 مليار دولار مقابل 1.6 مليار دولار في نفس الشهر السنة اللي فاتت
ولفت بانكير لأهمية الزيادة في التوقيت دا وقال إن تحويلات المصريين بالخارج دي بتمثّل واحدة من أهم مصادر الدخل للدولة من العملة الصعبة خصوصًا مع الظروف الاقتصادية اللي بتخلّي توفر الدولار شحيح جدًا..و التحويلات دي بتمثل تقريبًا المصدر الأول للدخل من بره بعد عائدات قناة السويس.. ولما الأرقام بتزيد بالشكل ده.. ده بيساهم بشكل مباشر في زيادة الاحتياطي النقدي الأجنبي وده طبعًا بيدي للبنك المركزي قدرة على إدارة الأزمة الاقتصادية بشكل أحسن وبيخفف من الضغط على الجنيه المصري
وشرح بانكير إن الزيادة الأخيرة في التحويلات بتأثر مباشرة على سعر صرف الدولار في البنوك وشركات الصرافة.. لأن لما الدولار بيبقى متوفر أكتر بسبب التحويلات ده بيساعد شوية في استقرار السعر أو على الأقل يبطّئ من ارتفاعه.. و في الفترات اللي الدولار فيها كان قليل كتير من المصريين المغتربين كانوا بيروحوا للسوق السودا عشان يبيعوا الدولار بسعر أعلى لكن لما بنشوف إن التحويلات بترتفع بالشكل ده، ده ممكن يخلّي السوق السودا ميبقاش عندها تأثير قوي زي الأول.
