ترقب حذر قبل القرار المرتقب.. أسواق مصر فى انتظار مفاجأة المركزي
يا ترى إيه اللي هيحصل في الأسواق الفترة الجاية؟ وهل البنك المركزي هيغير اتجاه الفايدة؟ طب لو حصل إيه تأثير ده على أسعار الدهب؟ والدولار هيطلع ولا هينزل؟ كلها أسئلة شاغلة السوق وكل واحد مستني قرار لجنة السياسة النقدية بكره وعاوز يعرف ايه اللى هيحصل
الترقب في السوق حاليا في أعلى مستوياته.. كل الأنظار موجهة لاجتماع لجنة السياسة النقدية والسبب بسيط القرار اللى هيصدر عن اللجنة بكره ممكن يغير شكل الاقتصاد في مصر الفترة اللي جاية.
البنك المركزي رفع الفايدة أكتر من مرة السنة دي علشان يواجه التضخم اللي زاد بسبب الأوضاع الاقتصادية العالمية وكمان التغيرات الداخلية.
ةالسؤال اللي كل الناس بتسأله دلوقتي: هل هيستمر البنك المركزي في رفع الفايدة؟ ولا ممكن يبقى فيه تثبيت أو حتى خفض مفاجئ؟
التوقعات كلها بتقول إن اللجنة ممكن تميل لتثبيت الفايدة في الاجتماع ده.
طب ليه تثبيت مش خفض ؟
التضخم في أكتوبر كان أقل من المتوقع وده بيشجع على التريث قبل أي قرار جديد لكن، في نفس الوقت، المركزي مش ممكن يخاطر لو لقى إن التضخم لسه فيه تهديد للاستقرار الاقتصادي.. كمان فيه عامل مهم جدًا، وهو تأثير القرار على الاستثمار الأجنبي.. لو الفايدة ارتفعت أكتر ممكن يجذب استثمارات جديدة في أدوات الدين، لكن في المقابل هيزود تكلفة التمويل على الحكومة والشركات.
طب ايه تاثير القرار المنتظر على الدهب؟
سعر الدهب في السوق المصري مرتبط بشكل كبير بسعر الدولار وبأسعار الدهب العالمية.. لو المركزي قرر يرفع الفايدة، ده ممكن يقوي الجنيه شوية مقابل الدولار وده هيضغط على أسعار الدهب محليًا بس خلي بالك لو المستثمرين حسوا بأي قلق الدهب عالميًا ممكن يرتفع كملاذ آمن وده هيأثر علينا هنا حتى لو الجنيه قوي
وبالنسبة للدولار،القرار المنتظر ممكن يلعب دور كبير لو الفايدة تثبت أو تقل، الدولار ممكن يرتفع شوية بسبب زيادة الطلب عليه في السوق لكن لو المركزي فاجئنا ورفع الفايدة ده ممكن يهدّي الطلب على الدولار ويرجعه خطوة لورا
الخلاصة .. السوق كله في وضع "انتظار وترقب". قرار البنك المركزي يكره مش بس هيأثر على المستثمرين الكبار ده هيأثر على كل حاجة من أول سعر الدهب اللي بنشتريه للادخار لحد أسعار السلع والخدمات اللي بنتعامل معاها كل يوم. والناس كلها بتسأل: هل المركزي هيكون عنده الجرأة إنه يخاطر، ولا هيختار الطريق الآمن؟
استنوا القرار بكره ولو عايزين تحليل فوري وتأثير القرار على السوق خليكم متابعينا وهنقولكم كل جديد أول بأول
