"نص جنيه دهب" من البنك ده لعملائه.. شوف السبب

في الأيام الأخيرة، بنك ناصر الاجتماعي، أعلن عن مشاركته مع شبكة ميزة الوطنية في مسابقة لعملاء البنك، واللي بتيجي تحت شعار "دايما ادفع بميزة تكسب ميزة".

عشان كده، البنك ده بيدي فرصة لاشتراك حاملي بطاقة ميزة، في أكبر عدد من معاملات الشراء، والفرصة هتكون في السحب للفوز بنصف جنيه دهب.

ونقدر نقول، إن المسابقة دي خاصة بالمشتريات فقط، وهيكون في فرصة أن عميل البنك يكسب من ضمن 100 فائز كل شهر، وبتستمر المسابقة دي  لحد يوم 31 ديسمبر 2024 يعني نهاية السنة دي.

بس خلي بالك، مافيش حد أدنى مطلوب لقيمة المشتريات، والمسابقة مقامة تحت إشراف وزارة التضامن الاجتماعي، وكمان بنك ناصر أطلق المسابقة دي ضمن خطة  الشمول المالي، عشان يقدم تسهيلات في خدماته وكمان يكافىء عملاء المشتريات.

وفي الفترة الأخيرة، بنك ناصر  أصدر أكثر من مليون بطاقة ميزة، وده بيجي ضمن توجه الدولة لدعم وتشجيع تقديم الخدمات المالية الإلكترونية لجميع فئات المجتمع.

وبالفعل، تم إصدار بطاقة ميزة لعملاء البنك لاستخدامها في عمليات المدفوعات الحكومية والصرف النقدي من خلال فروع البنك واللي وصل عددها إلى 102 فرع، ولاقت الخدمة دي إقبال كبير من العملاء، لأنها بتيح لهم استخدام البطاقة على مدار 24 ساعة للسحب من الصراف الآلي أو الشراء.